【走塑】帶著餐盒去掃街
【走塑】帶著餐盒去掃街
#Eco Friendly2017-07-31

雞蛋仔、炸大腸、碗仔翅,仲有魚蛋燒賣同牛雜… 香港嘅街頭小食實在令人難以抗拒!行一條街可以密密食到冇停口,同時,啲發泡膠兜、膠袋都密密掉到冇停手!

伙計自問都係一個怕麻煩又怕羞嘅人,要同秒秒鐘幾十蚊上落嘅小食店阿姐講「走塑」,都覺得心大心細好難開口。不過,望望食店門口嗰一大籮垃圾,又諗諗一個發泡膠兜嘅使用時間只係幾分鐘,去到堆填區分解就要等幾百年… 嗰下真係於心不忍!

咁既然我有個平時用嚟帶飯嘅「伸縮食物盒」喺身 (入得微波爐又方便攜帶真係好用),就不如真係試下問啦,如果真係俾阿姐白眼黑面或者恨恨拒絕,咁就算數囉…

「廿蚊煎釀三寶… 用我個兜吖唔該!」我終於同嘅木口木面嘅阿姐開口講咗!阿姐 keep 住木無表情但回咗我超 nice 嘅一句︰「好,醒多兩舊俾你啦!」

就咁,我嘅「帶著餐盒去掃街」測試成功了!唔肯定下一次會唔會咁成功,但肯定我會繼續試!(下次要試埋走竹籤~ )

選購環保餐具︰https://goo.gl/pxoQw6