【買手手記】我的綠寶時代
【買手手記】我的綠寶時代
#Buyer Journal2016-10-25

我係一位 90 後買手。
記憶所及,我讀小學期間飲過人生第一次嘅樽裝綠寶,但後來唔知點解佢越黎越難搵。最後,仲要已經絕跡埋。

細細個呀媽總係唔鍾意細路仔飲汽水,可能係冇益或者怕我地上癮,我唯有飲橙汁。有一次同同學跳完大繩,玩到熱就飲支冰凍綠寶,即時解渴順喉,又唔算好甜。果次係我第一次接觸綠寶。

之後小食亭老闆話綠寶已經搬左去泰國生產,佢亦冇再入貨。升上中學後,小食亭雪櫃只見維他橙汁以及新奇士 OJ 橙汁,一直都搵唔到綠寶嘅蹤影。

直至有一次於超市見到綠寶 250ml X 6包裝,感覺就好似見番我相識左n 年嘅好朋友咁,我即刻買左幾pack返屋企,同小學知己分享。後來我再返去諗住買嘅時候,綠寶又消失左囉。原本以為佢又返返香港,不過原來只係曇花一現。

直至今年入左士多做買手,我先發現原來綠寶又返左黎啦!我係士多搵返我嘅童年回憶。
依家士多每兩個月就係泰國入一次貨,而負責訂貨嘅人就係我。
因為咁樣,我又再飲返綠寶,而家我每一次飲綠寶,都會訂多幾支俾當年跳大繩嘅隊友支飲。

好多人和事只能成為回憶,如果佢有機會復活,您又會點做呢?我呀?我會繼續飲住綠寶諗起跳大繩嘅回憶囉!